Në një situatë të vështirë të krijuar nga bllokimi i aksit kombëtar Librazhd–Prrenjas në Kthesat e Dragostunjës, janë banorët e fshatit Spathar ata që po japin një shembull të rrallë solidariteti dhe përgjegjësie qytetare. Gjatë gjithë ditës së dielë, por edhe në orët e vona të mbrëmjes, ata – në bashkëpunim të ngushtë me Policinë Rrugore – kanë qenë në terren për të ndihmuar drejtuesit e mjeteve të mbetur të bllokuar në rrugë.
Banorët po orientojnë dhe shoqërojnë shoferët drejt rrugëve alternative, duke i udhëhequr me kujdes përmes territorit të fshatit të tyre, në kushte të vështira terreni dhe errësire. Falë kësaj ndihme, shumë automjete kanë mundur të vijojnë lëvizjen:
• Nga Dardha drejt Hotolishtit, për të vazhduar më tej në drejtim të Korçës,
• Si dhe nga Spathari drejt Babjes, për në Semës, në dalje të Librazhdit drejt Elbasanit, në anën tjetër të aksit të bllokuar.
Policia Rrugore ka qenë e pranishme gjatë gjithë kohës, duke menaxhuar trafikun, garantuar sigurinë dhe koordinuar lëvizjen e mjeteve në këto segmente alternative, ndërsa bashkëpunimi me banorët vendas ka qenë vendimtar për shmangien e kaosit dhe rreziqeve të mëtejshme.
Kjo situatë ka nxjerrë në pah jo vetëm problematikat e infrastrukturës rrugore në zonë, por edhe forcën e solidaritetit njerëzor, ku qytetarë të thjeshtë, pa asnjë detyrim, janë kthyer në mbështetjen kryesore për qindra udhëtarë të bllokuar në mes të rrugës.Një shembull që meriton vlerësim dhe respekt.
