ELBASAN, 5 tetor 2026 /Albania Express News/- Administratori i shoqërisë “ECO-ELB” sh.a., Leli Kaja, është arrestuar në flagrancë nga hetuesit e Byrosë Kombëtare të Hetimit (BKH), nën drejtimin e prokurorit të çështjes, nën dyshimin për kryerjen e veprës penale “Korrupsioni pasiv i personave që ushtrojnë funksione publike”.
Sipas njoftimit zyrtar të Prokurorisë së Posaçme kundër Korrupsionit dhe Krimit të Organizuar (SPAK), arrestimi është kryer më 5 tetor 2026, në kuadër të procedimit penal nr. 108 të vitit 2026, të regjistruar më 1 tetor 2026, pas një referimi të BKH-së.
SPAK bën me dije se gjatë hetimit janë përdorur metoda speciale të hetimit dhe veprime të simuluara.
Nga veprimet hetimore të kryera deri në këtë fazë, sipas SPAK, dyshohet se Leli Kaja ka kërkuar dhe marrë shumën prej 400 mijë lekësh nga administratori i një operatori ekonomik, në formën e një përfitimi të paligjshëm.
Sipas hetuesve, shuma dyshohet se është dhënë në këmbim të moskryerjes së detyrave që i ngarkon ligji administratorit të shoqërisë “ECO-ELB” sh.a.
Gjatë kontrollit personal të kryer pas arrestimit, hetuesit i kanë gjetur dhe sekuestruar Kajës shumën prej 400.000 lekësh, për të cilën SPAK dyshon se përbën përfitimin e paligjshëm të lidhur me veprën penale.
Hetimet vijojnë për të dokumentuar në mënyrë të plotë rrethanat e rastit, si dhe për identifikimin e personave të tjerë që mund të jenë të përfshirë.
SPAK thekson se procedimi është ende në fazën e hetimit dhe se çdo person prezumohet i pafajshëm deri në provimin e fajësisë me vendim gjyqësor të formës së prerë.