Me mbështetjen e plotë të Kryetarit të Bashkisë Elbasan, z. Gledian Llatja, ka nisur zyrtarisht procesi i kandidimit të qytetit për titullin prestigjioz “European City of Sport 2027”.
Bashkia Elbasan ndodhet aktualisht në fazën përgatitore për t’u bërë pjesë e rrjetit ndërkombëtar ACES Europe, me seli në Bruksel, organizata që vlerëson dhe promovon qytetet europiane për angazhimin e tyre në zhvillimin e sportit dhe jetesës aktive.
Ky hap konsiderohet strategjik për forcimin e politikave sportive vendore dhe rritjen e profilit të qytetit në arenën europiane.
Kandidatura nuk synon vetëm fitimin e një titulli simbolik, por përfaqëson një angazhim konkret për përmirësimin e infrastrukturës sportive, rritjen e cilësisë së aktiviteteve dhe fuqizimin e rolit të sportit në jetën komunitare.
Elbasani mbështetet në një traditë të konsoliduar sportive dhe në infrastrukturë moderne. Pallati i Sportit “Tomorr Sinani” shërben si qendër për zhvillimin e basketbollit, volejbollit, handbollit dhe disiplinave të tjera të sporteve me dorë.
Ndërkohë, “Elbasan Arena”, stadium i kategorisë UEFA me 12,800 vende, është shtëpia e AF Elbasani dhe një nga impiantet më të rëndësishme sportive në vend.
Përveç sporteve tradicionale, në qytet zhvillohen aktivisht edhe karateja, çiklizmi, atletika, ping-pongu, peshëngritja, aktivitetet në natyrë dhe programet e fitness-it, duke përfshirë një gamë të gjerë grupmoshash.
Objektivat kryesore të kandidaturës përfshijnë:
- Rritjen e investimeve në infrastrukturë sportive moderne;
- Krijimin e më shumë mundësive për të rinjtë dhe talentet lokale;
- Promovimin e jetesës së shëndetshme për të gjitha moshat;
- Nxitjen e zhvillimit ekonomik dhe turizmit sportiv përmes organizimit të eventeve madhore.
Sipas Bashkisë, kjo iniciativë është pjesë e strategjisë afatmesme të Drejtorisë së Sporteve, e cila synon që nga viti 2026 të rrisë ndjeshëm numrin e aktiviteteve ndërkombëtare në qytet, duke kontribuar njëkohësisht në zhvillimin sportiv, forcimin e trashëgimisë kulturore dhe promovimin e një jete aktive për komunitetin.
Me nisjen e këtij procesi, Elbasani synon të pozicionohet si një qendër e rëndësishme sportive në rajon dhe në Europë, duke e konsideruar kandidaturën si një investim në identitetin dhe të ardhmen e qytetit.
