TIRANË, 6 prill /Albania Express News/ Agroturizmet po shndërrohen gjithnjë e më shumë në qendra të rëndësishme të zhvillimit ekonomik dhe social në rajone të ndryshme të vendit, duke kontribuar në rritjen e punësimit dhe forcimin e ekonomisë rurale.
Kryeministri Edi Rama ndau në rrjetet sociale pamje piktoreske nga agroturizëm Alpeta në zonën e Roshnikut, Berat, duke e cilësuar atë si një shembull të suksesshëm të zhvillimit të këtij sektori.
“Agroturizëm Alpeta, në Roshnik të Beratit, aty ku natyra dhe shija bëhen një dhe ku çdo produkt, nga frutat e perimet te mishi, vjen drejtpërdrejt nga ferma,” shkroi Rama.
Sipas tij, modele të tilla agroturizmi jo vetëm që promovojnë bukuritë natyrore dhe traditat kulinare shqiptare, por gjithashtu kontribuojnë në zhvillimin e qëndrueshëm të zonave rurale.
Agroturizmet po luajnë një rol të rëndësishëm në krijimin e një zinxhiri të integruar prodhimi, duke lidhur drejtpërdrejt fermerët me konsumatorët dhe duke rritur vlerën e produkteve vendase. Ky model zhvillimi po ndihmon në rritjen e të ardhurave për komunitetet lokale, si dhe në krijimin e vendeve të reja të punës.
Ekspertët e sektorit vlerësojnë se agroturizmi përbën një potencial të madh për ekonominë shqiptare, duke nxitur turizmin gjithëvjetor dhe duke diversifikuar ofertën turistike të vendit, ndërkohë që mbështet zhvillimin e qëndrueshëm të bujqësisë dhe zonave rurale.