Pas më shumë se pesë muajsh nga mbajtja e zgjedhjeve, Kuvendi i Kosovës ka përfunduar konstituimin e plotë të legjislaturës së nëntë, pas publikimit të aktgjykimit të plotë nga Gjykata Kushtetuese.
Në seancën e sotme, Nenad Rashiq nga partia Për Liri, Drejtësi dhe Mbijetesë, u zgjodh nënkryetar i Kuvendit të Kosovës, pas dështimit të nëntë propozimeve të Listës Serbe dhe kalimit të procesit në procedurën e shortit.
Me 71 vota pro, 9 kundër dhe 24 abstenime, Rashiq siguroi mbështetjen e deputetëve të Lëvizjes Vetëvendosje, Lidhjes Demokratike të Kosovës, si dhe disa përfaqësuesve të komuniteteve joshumicë joserbe. Deputetët e Partisë Demokratike të Kosovës dhe të Aleancës për Ardhmërinë e Kosovës abstenuan, ndërsa Lista Serbe votoi kundër.
Kryetari i Kuvendit, Dimal Basha, gjatë seancës theksoi se ishte i detyruar të përdorte shortin si mekanizëm zhbllokues, pasi përfaqësuesi i deputetëve serb, Igor Simiq nga Lista Serbe, refuzoi të propozonte kandidatin e mbetur.
“Meqë po refuzohet të propozohet kandidati që përfaqëson komunitetin serb, në përputhje me nenin 67 të Kushtetutës, jam i detyruar të vazhdoj me procedurën e shortit”, deklaroi Basha.
Nga ana e tij, Simiq argumentoi se propozimi i një kandidati tjetër do të ishte “shkelje kushtetuese”, duke insistuar se pozita e nënkryetarit i takon vetëm grupit të Listës Serbe.
Me këtë votim, Kuvendi i Kosovës ka tashmë të zgjedhur kryetarin dhe pesë nënkryetarët, duke përmbyllur procesin e konstituimit të plotë të legjislaturës së re.