Konferenca e Kryetarëve këtë të mërkurë u shoqërua me debate mes deputetëve të mazhorancës dhe opozitës, pas vrasjes së gjyqtarit Astrit Kalaja.
Kryetari i Grupit Parlamentar të Partisë Socialiste, Taulant Balla, kërkoi që në seancën plenare të nesërme të mbahet një minutë heshtje në nder të gjyqtarit.
Ndërkohë, sekretari i Partisë së Lirisë, deputeti Tedi Blushi, vlerësoi ngjarjen si një akt terrorist dhe alarm kombëtar për sigurinë e jetës, duke theksuar se Kuvendi nuk duhet të mjaftohet vetëm me një minutë heshtje:
“Krimi ka marrë yrysh dhe shqiptarët janë më të pasigurt se kurrë. Vrasja e gjyqtarit është një krim shumë i rëndë që trondit ndërgjegjen kombëtare. Kuvendi duhet të debatojë për realitetin tragjik ku ndodhet vendi, ku krimi sfidon ligjin pa frikë. E turpshme që KLGJ bën publik paralajmërimet e qeverisë për sigurinë e gjyqtarëve vetëm pasi ndodhi vrasja.”
Gjatë konferencës, opozita kërkoi gjithashtu që institucionet shtetërore të nisin procedurat dhe të shpallin gjyqtarin Astrit Kalaja Dëshmor të Atdheut.