Ministrja Sala kërkon dorëheqjen e të gjithë drejtorëve,largohet drejtori i QSUT, Florenc Spaho
Ministrja e Shëndetësisë, Prof. Evis Sala, ka kërkuar zyrtarisht dorëheqjen e të gjithë drejtorëve të institucioneve shëndetësore në vend. Kjo lëvizje vjen vetëm pak javë pas emërimit të saj në krye të Ministrisë së Shëndetësisë dhe pritet të shënojë fillimin e një reforme të gjerë në sistemin shëndetësor.
Në kuadër të këtij procesi, drejtori i Qendrës Spitalore Universitare “Nënë Tereza” (QSUT), Florenc Spaho, ka dhënë dorëheqjen. Spaho ishte emëruar në këtë detyrë vetëm dy muaj më parë, por largimi i tij vjen në një moment kur nuk janë bërë ende të ditura arsyet zyrtare të kësaj dorëheqjeje.
Ministrja Evis Sala është një emër me profil të lartë akademik dhe profesional në fushën e mjekësisë. Ajo drejton aktualisht Qendrën për Imazheri Diagnostike dhe Radioterapi Onkologjike në Poliklinikën “Gemelli” dhe është pedagoge në institucionet e arsimit të lartë, ku kontribuon në formimin e brezit të ri të profesionistëve të shëndetit.
Me një karrierë të gjatë kërkimore dhe akademike në Mbretërinë e Bashkuar, Prof. Sala ka qenë për shumë vite pjesë e Universitetit të Kembrixhit, ku ka bashkëdrejtuar Programin e Avancuar të Imazhimit të Kancerit dhe Programin e Integruar të Mjekësisë së Kancerit në Qendrën e Kërkimit të Kancerit në Kembrixh.
Burime pranë ministrisë theksojnë se dorëheqjet e kërkuara janë pjesë e një analize të thelluar për performancën, integritetin dhe vizionin e drejtuesve të institucioneve kryesore shëndetësore, me qëllim ngritjen e një administrate më të përgjegjshme dhe më efikase në shërbim të qytetarëve.