Sot, ministri i ri i Bujqësisë, Zhvillimit Rural dhe Administrimit të Ujërave (MBZHR), Andis Salla, u prezantua zyrtarisht me stafin drejtues të ministrisë, së bashku me Zv. Kryeministren Belinda Balluku. Gjatë takimit u theksua rëndësia e vijimit të projekteve dhe reformave që synojnë modernizimin e sektorit bujqësor dhe zhvillimin rural.
Salla u shpreh se puna e vazhdueshme për forcimin e kapaciteteve institucionale dhe promovimin e teknologjive moderne është kyçe për përparimin e sektorit, në përputhje me vizionin strategjik Bujqësia2030 dhe procesin e integrimit në Bashkimin Evropian.
“Ky vizion synon të krijojë një sektor bujqësor më konkurrues, më të gjelbër dhe të orientuar drejt tregut europian, duke garantuar qëndrueshmëri dhe standarde të larta të prodhimit”, tha ndër të tjera ministri i ri.
Sallës shprehu mirënjohjen për punën e palodhur të Ministres Anila Denaj dhe të gjithë stafit të MBZHR, duke nënvizuar rëndësinë e bashkëpunimit për të çuar përpara iniciativat strategjike që do të ndikojnë drejtpërdrejt në zhvillimin ekonomik dhe modernizimin e fshatrave.
Takimi i sotëm u fokusua edhe tek prioritetet e mandatit të ri, përfshirë inovacionin, digjitalizimin, përmirësimin e infrastrukturës rurale dhe politika që mbështesin fermerët në përputhje me standardet europiane.