Grupi i këshilltarëve të Partisë Socialiste në Këshillin Bashkiak të Tiranës ka depozituar një kërkesë zyrtare për shkarkimin e kryetarit të Bashkisë Tiranë, Erion Veliaj. Në relacionin e paraqitur, theksohet se prej 10 shkurtit 2025, kryeqyteti ka mbetur pa drejtues të zgjedhur, për shkak të proceseve penale ndaj Veliajt, çka sipas tyre e bën të domosdoshme nisjen e procedurave për zëvendësim.
Sipas projektvendimit të hartuar nga Këshilli Bashkiak, kërkesa mbështetet në Ligjin nr. 139/2015 “Për Vetëqeverisjen Vendore”, i cili parashikon shkarkimin e kryetarëve të bashkive në rast të mosparaqitjes në detyrë për një periudhë 3-mujore.