Java e parë e fazës së grupeve në UEFA Champions League dhuroi spektakël, surpriza dhe gola të shumtë.
Në “Etihad Stadium”, Manchester City fitoi me rezultat 2-0 ndaj Napolit. Miqtë mbetën me 10 lojtarë që në minutën e 21-të, pasi Di Lorenzo u ndëshkua me karton të kuq. Në pjesën e dytë, norvegjezi Erling Haaland zhbllokoi rezultatin (56’), ndërsa Jeremy Doku dyfishoi pas vetëm 9 minutash (65’).
Në Angli, Barcelona triumfoi 2-1 në fushën e Newcastle. Protagonist absolut ishte Marcus Rashford, i cili shënoi dy golat për katalanasit (58’, 67’), duke përjetuar një kthim ëndrrash në tokën angleze. Vendasit gjetën golin e nderit me Anthony Gordon në minutën e fundit të kohës së rregullt, por ishte tepër vonë për të ndryshuar fatin e ndeshjes.
Një tjetër sfidë e madhe u zhvillua në Gjermani, ku Eintracht Frankfurt mposhti kampionët e Turqisë, Galatasaray, me një rezultat të thellë 5-1. Edhe pse turqit kaluan të parët në avantazh, gjermanët reaguan fuqishëm duke shënuar pesë herë dhe duke i dhënë një shuplakë të rëndë kundërshtarëve.
Në Portugali, Sporting Lisbona mposhti debutuesit e Kairat Almaty me shifrat 4-1, ndërsa në Danimarkë, Kopenhagen dhe Bayer Leverkusen ndanë nga një pikë pas barazimit spektakolar 2-2.
Ndërkohë, Club Brugge bëri një paraqitje madhështore ndaj Monacos, duke fituar me rezultatin 4-1. Belgët dominuan të gjithë ndeshjen, ndërsa francezët arritën vetëm një gol nderi me Ansu Fatin në fund.