Kryeministri Edi Rama ka njoftuar sot nga Brukseli hapjen e 4 kapitujve të rinj të negociatave për anëtarësimin e Shqipërisë në Bashkimin Evropian.
Në një ceremoni simbolike me Komisioneren Evropiane për Zgjerimin, Marta Kos, u theksua se Shqipëria po ecën me ritme të shpejta në procesin e integrimit, ndërsa kanë mbetur edhe 5 grupkapituj për t’u hapur.
“Kanë mbetur edhe pesë dhe çelen të gjitha,” u shpreh Rama, ndërsa Kos garantoi se ato do të hapen brenda këtij viti, me synim që negociatat të përmbyllen deri në vitin 2027.
Grupkapitulli 4 i hapur sot përfshin fusha të rëndësishme si tranzicioni i gjelbër, mbrojtja e mjedisit, energjia e pastër dhe ndërlidhja e qëndrueshme e transportit, që lidhen drejtpërdrejt me Marrëveshjen e Gjelbër Evropiane.
Komisionerja Kos u shpreh se është mbresëlënëse mënyra se si Shqipëria ka përshpejtuar reformat dhe falënderoi Ramën dhe ekipin e tij për përkushtimin.
“Është vërtet privilegj të punoj me ju. Urime edhe njëherë,” tha ajo.
Nga ana e tij, Rama theksoi se nderi është i gjithi i Shqipërisë, duke falënderuar ekipin e BE-së në Tiranë për mbështetjen e vazhdueshme.
