PRISHTINË, 5 tetor 2026 /Albania Express News/- Tensione janë shënuar sot para Kuvendit të Kosovës, ku protestuesit kanë ndaluar deputetin e Lëvizjes Vetëvendosje, Fahrush Rexhepi, teksa ai po tentonte të largohej nga hapësirat e Kuvendit.
Sipas pamjeve të publikuara nga mediat kosovare, protestuesit i janë afruar deputetit, e kanë kapur fizikisht dhe e kanë kthyer sërish brenda hapësirës së rrethuar të Kuvendit.
Ngjarja ndodhi në një klimë të tensionuar jashtë godinës së Kuvendit, ku protestuesit kanë bllokuar hyrje-daljet dhe u kanë kërkuar deputetëve të mos largohen pa vijuar procedura për ndryshimet në Ligjin për Dhomat e Specializuara.
Kuvendi i Kosovës e ka miratuar sot në lexim të parë projektligjin për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar, me 91 vota pro, asnjë kundër dhe asnjë abstenim. Projektligji duhet të kalojë edhe në lexim të dytë për miratimin përfundimtar.
Protestuesit, megjithatë, kanë deklaruar se nuk do të largohen dhe kërkojnë që ndryshimet të miratohen edhe në leximin e dytë.
Pamjet e incidentit me deputetin Rexhepi janë shpërndarë gjerësisht në mediat kosovare, duke pasqyruar tensionin e krijuar rreth ndërtesës së Kuvendit gjatë zhvillimit të seancës.