ELBASAN, 25 shtator 2026 /Albania Express News/- Universiteti i Elbasanit “Aleksandër Xhuvani” ka nisur zyrtarisht fazën e parë të raundit të dytë të regjistrimeve për programet e studimit të ciklit Bachelor, si edhe për programet e Masterit.
Institucioni universitar ka njoftuar se dyert janë të hapura për kandidatët e rinj që kanë fituar të drejtën e studimit, si dhe për studentët që synojnë të vijojnë formimin dhe specializimin e tyre akademik në ciklin e dytë të studimeve.
Në kuadër të procesit të regjistrimeve, stafet administrative të fakulteteve të Universitetit të Elbasanit janë në gatishmëri për t’u ofruar kandidatëve informacionin dhe mbështetjen e nevojshme, me synim lehtësimin e procedurave dhe përfundimin e regjistrimit brenda afateve të përcaktuara.
Raundi i dytë përbën një tjetër mundësi për maturantët dhe kandidatët që kanë përzgjedhur Universitetin e Elbasanit si institucionin ku do të vijojnë studimet e larta, ndërsa për programet Master ai përfaqëson një hap të rëndësishëm për thellimin e njohurive dhe zhvillimin e mëtejshëm profesional.
Universiteti i Elbasanit “Aleksandër Xhuvani” u ka përcjellë urimet e tij të gjithë kandidatëve, duke i inkurajuar të shfrytëzojnë këtë fazë të rëndësishme të rrugëtimit të tyre akademik dhe profesional.
Albania Express News u uron suksese të gjithë studentëve dhe kandidatëve në rrugëtimin e tyre universitar.
