Nga Sara Tarko
DIVJAKË, 23 shtator 2026 /Albania Express News/- Me nisjen e vitit të ri shkollor, në Bashkinë Divjakë u zhvillua një takim i përbashkët me fokus forcimin e sigurisë në institucionet arsimore, parandalimin e dhunës dhe sjelljeve të rrezikshme, si dhe mbrojtjen e fëmijëve dhe të rinjve nga përfshirja në veprimtari të paligjshme.
Takimi u zhvillua në kuadër të projektit “Skuadra e Sigurisë Publike 2 – Partner për një komunitet të sigurt”, të zbatuar nga Qendra Epoka e Re, me synim rritjen e bashkëpunimit mes institucioneve dhe komunitetit për krijimin e një mjedisi më të sigurt për nxënësit.
Gjatë diskutimeve u trajtuan disa prej çështjeve kryesore që lidhen me sigurinë në shkolla, përfshirë:
- rritjen e sigurisë brenda dhe përreth institucioneve arsimore;
- parandalimin e dhunës dhe sjelljeve të rrezikshme;
- identifikimin dhe referimin në kohë të rasteve problematike;
- forcimin e bashkëpunimit ndërinstitucional për mbrojtjen e fëmijëve dhe të rinjve.
Në fokus u vendos rëndësia e reagimit në kohë ndaj problematikave, si dhe krijimi i një rrjeti bashkëpunimi mes shkollave, institucioneve publike, familjeve dhe komunitetit.
Mesazhi i përcjellë gjatë aktivitetit ishte se siguria në shkolla është një përgjegjësi e përbashkët, ku angazhimi i të gjithë aktorëve të komunitetit luan një rol të rëndësishëm në parandalimin e rreziqeve dhe mbrojtjen e nxënësve.
