LIBRAZHD, 21 shtator 2026 /Albania Express News/- Në Gjimnazin “Ibrahim Muça” u zhvilluan zgjedhjet për krijimin e Qeverisë së Nxënësve, një proces që synon të forcojë përfaqësimin e nxënësve dhe përfshirjen e tyre aktive në jetën dhe veprimtaritë e institucionit arsimor.
Procesi zgjedhor nisi me përzgjedhjen e senatorëve nga klasat përkatëse. Mes senatorëve të zgjedhur, tre nxënëse shpallën kandidaturën për postin e presidentes së Qeverisë së Nxënësve.
Kandidate për këtë detyrë ishin:
- Fjuida Kurti
- Ajsi Bahiti
- Dea Mema
Pas zhvillimit të procesit të votimit, i cili u krye në mënyrë të fshehtë, Fjuida Kurti mori shumicën e votave dhe u shpall presidente e Qeverisë së Nxënësve të Gjimnazit “Ibrahim Muça”.
Shkolla i ka uruar suksese Fjuida Kurtit në detyrën e re, duke vlerësuar angazhimin e saj dhe duke shprehur besimin se ajo do të përfaqësojë me përgjegjësi zërin dhe interesat e nxënësve.
Njëkohësisht, drejtuesit e shkollës kanë shprehur falënderimet dhe mirënjohjen për dy kandidatet e tjera, Ajsi Bahiti dhe Dea Mema, për pjesëmarrjen dhe gatishmërinë e tyre për të kontribuar në jetën e shkollës.
Në kuadër të organizimit të ri të Qeverisë së Nxënësve, shkolla ka falënderuar gjithashtu mësuese Migena Hasën, e cila është zgjedhur në detyrën e Koordinatores së Qeverisë së Nxënësve, duke i uruar suksese në angazhimin e saj të ri.
Zgjedhjet e Qeverisë së Nxënësve përbëjnë një mundësi të rëndësishme që të rinjtë të njihen me parimet e përfaqësimit, bashkëpunimit dhe përgjegjësisë qytetare, duke marrë një rol më aktiv në komunitetin shkollor.
Albania Express News i uron suksese presidentes së re, Fjuida Kurti, si dhe të gjithë senatorëve dhe stafit të përfshirë në funksionimin e Qeverisë së Nxënësve.