Elbasan, 18 shtator 2026 /Albania Express News/-Përplasja në distancë mes Emiljano Mustës dhe drejtuesve të AF Elbasanit vijon edhe pas largimit të mbrojtësit nga skuadra verdheblu.
Musta, i cili këtë sezon është pjesë e Vllaznisë së Shkodrës, ka folur publikisht për largimin e tij nga Elbasani, duke deklaruar se nuk ishte zgjedhja e tij për të mos vijuar bashkëpunimin me klubin.
Sipas futbollistit, një nga arsyet lidhej me ofertën për rinovimin e kontratës, të cilën ai e ka konsideruar shumë të ulët. 34-vjeçari ka folur gjithashtu për mungesën e mbështetjes nga persona të rëndësishëm pranë klubit.
Deklaratat e Mustës kanë sjellë një reagim të tërthortë nga drejtori sportiv i AF Elbasanit, Elton Guranjaku.
Përmes një postimi në rrjetet sociale, pa iu drejtuar drejtpërdrejt me emër ndonjë personi, Guranjaku shkruan:
“Shumë njerëz do të binin dakord se organi më jetik është truri ose zemra. Unë mendoj se është shtylla kurrizore.”
Mesazhi i drejtorit sportiv vjen në një kohë kur marrëdhënia mes ish-futbollistit të Elbasanit dhe klubit është shoqëruar me debate publike, veçanërisht pas incidentit të fundit me tifozët verdheblu.
Guranjaku nuk ka dhënë detaje të tjera lidhur me postimin dhe nuk ka përmendur drejtpërdrejt Emiljano Mustën.
Ndërkohë, Musta tashmë është pjesë e Vllaznisë, ndërsa AF Elbasani vijon përgatitjet për sfidat e radhës në kampionat.