LEZHË, 16 shtator 2026 /Albania Express News/- Dega e Partisë Demokratike në Lezhë ka hyrë në një fazë të re riorganizimi, pas zgjedhjes së pesë nënkryetarëve të rinj nga Kryesia e degës.
Në strukturën e re drejtuese janë përfshirë Altin Mema, Anila Frroku, Emilian Frani, Florian Suli dhe Soveljan Kosova, të cilët vijnë nga profile të ndryshme profesionale dhe akademike.
Altin Mema është pedagog i komunikimit, Anila Frroku avokate, Emilian Frani inxhinier mekanik, Florian Suli ekonomist, ndërsa Soveljan Kosova ekspert financiar.
Zgjedhja e tyre është pjesë e procesit të riorganizimit dhe ripërtëritjes së strukturave të PD-së në Lezhë, me synim forcimin e organizimit të brendshëm, aktivizimin e bazës dhe përgatitjen e strukturave për përballjet e ardhshme elektorale.
Ekipi i ri drejtues pritet të punojë në koordinim me kryetaren e degës dhe Kryesinë e PD Lezhë, duke u fokusuar te zgjerimi dhe konsolidimi i strukturave në terren, komunikimi me qytetarët dhe rritja e aktivitetit politik të degës.
Një prej objektivave të shpallura të demokratëve në Lezhë është rikthimi në drejtimin e Bashkisë Lezhë. Procesi zgjedhor vendor i vitit 2019 në këtë bashki u zhvillua pa pjesëmarrjen e opozitës, pas bojkotit të zgjedhjeve vendore nga partitë kryesore opozitare.
Me përzgjedhjen e ekipit të ri drejtues, sekretariateve dhe departamenteve, PD Lezhë synon të konsolidojë strukturën organizative dhe të nisë një fazë të re përgatitore, ku gara për Bashkinë Lezhë është vendosur në qendër të objektivave politike të degës.
