Uashington, 15 shtator 2026 /Albania Express News/- Presidenti amerikan Donald Trump ka publikuar pamjet e para të platformës së re të uljes së helikopterëve në Shtëpinë e Bardhë, pjesë e projekteve të rinovimit që administrata e tij po zhvillon në kompleksin presidencial.
Heliporti i ri, me një diametër prej rreth 30 metrash, është realizuar me granit në nuanca të së zezës dhe të bardhës. Në qendër të platformës është vendosur një vulë presidenciale e punuar me granit të zi, duke i dhënë strukturës një pamje monumentale.
Trump e ka cilësuar platformën e re si një “vepër arti”, duke shprehur kënaqësinë për rezultatin e punimeve.
“Është punuar bukur nga graniti i gdhendur, në nuanca të së zezës dhe të bardhës”, shkroi presidenti amerikan në një postim në rrjetet sociale.
Në mënyrë karakteristike, Trump ka bërë edhe një deklaratë të pazakontë për jetëgjatësinë e strukturës, duke pretenduar se platforma do të zgjasë “mbi një milion vjet”.
Presidenti amerikan e ka lidhur projektin me vizionin e tij për transformimin e Shtëpisë së Bardhë, duke deklaruar se synon të rikthejë atë që e cilëson si bukurinë dhe shkëlqimin e rezidencës presidenciale.
“Është një nder, në kohën time të lirë, të jem në gjendje të rikthej bukurinë dhe shkëlqimin e Shtëpisë së Bardhë në nivele të papara më parë, as kur u ndërtua në vitin 1792”, u shpreh Trump.
Ai kritikoi gjithashtu gjendjen në të cilën, sipas tij, ishte lënë rezidenca presidenciale gjatë administratave të mëparshme.
“Tani është një pallat!”, deklaroi presidenti amerikan.
Vijojnë punimet për sallën e re të ballove
Ndërkohë, punimet në kompleksin e Shtëpisë së Bardhë vijojnë edhe për ndërtimin e sallës së re të ballove, një projekt madhor me vlerë të raportuar prej rreth 400 milionë dollarësh.
Sipas planit, projekti parashikon krijimin e një hapësire prej rreth 88 mijë metrash katrorë, në zonën ku ndodhej më parë Krahu Lindor, i cili u shemb me urdhër të Trump.
Administrata amerikane ka bërë të ditur se rreth 65 për qind e punimeve kanë përfunduar, ndërsa ekipet po punojnë me orare intensive, deri në 20 orë në ditë, shtatë ditë në javë.
Megjithatë, projekti është shoqëruar me polemika të forta dhe kundërshtime edhe në rrugë ligjore. Punimet u ndaluan më herët nga gjykatat, përpara se Gjykata Supreme e SHBA-së të lejonte përkohësisht vazhdimin e tyre.
Sipas administratës Trump, rreth 200 milionë dollarë në donacione private janë shpenzuar ose janë angazhuar tashmë për projektin.
Rinovimet e Shtëpisë së Bardhë janë shndërruar kështu në një prej projekteve më të diskutuara të mandatit të dytë të Trump, duke kombinuar investime të mëdha në infrastrukturën e rezidencës presidenciale me një vizion arkitektonik që presidenti amerikan e paraqet si rikthim të madh të prestigjit të saj.