ELBASAN, 14 shtator 2026 /Albania Express News/ – Në Institucionin e Ekzekutimit të Vendimeve Penale (IEVP) Elbasan ka nisur procesi mësimor për vitin shkollor 2026–2027, duke i dhënë një rëndësi të veçantë edukimit dhe formimit arsimor të personave që vuajnë dënimin në këtë institucion.
Ceremonia e hapjes së vitit të ri shkollor u zhvillua në prani të përfaqësueses së Drejtorisë së Përgjithshme të Burgjeve, Blerta Doçi, Drejtoreshës së shkollës “Ptoleme Xhuvani”, Rudina Biçaku, si dhe mësuesve të klasave paralele që zhvillojnë procesin mësimor në IEVP Elbasan.
Nisja e mësimit për 12 nxënës në arsimin fillor dhe 6 nxënës në sistemin part time në mjediset e institucionit penitenciar shihet si një mundësi e rëndësishme për përfitimin e njohurive, zhvillimin personal dhe forcimin e aftësive që mund të ndihmojnë në të ardhmen procesin e riintegrimit në shoqëri.
Në këtë drejtim, edukimi nuk përfaqëson vetëm një proces të marrjes së njohurive, por edhe një instrument për krijimin e mundësive të reja dhe përgatitjen e individëve për një jetë më të qëndrueshme pas përfundimit të vuajtjes së dënimit.
Gjatë ceremonisë u përcollën urime për një vit shkollor të mbarë dhe të suksesshëm, duke vënë theksin te përkushtimi, bashkëpunimi dhe arritja e rezultateve sa më të mira nga nxënësit dhe mësuesit.
“Arsimi është një mundësi për ndryshim, zhvillim dhe një të ardhme më të mirë”, ishte mesazhi i përcjellë me rastin e nisjes së vitit të ri shkollor.
IEVP Elbasan u ka uruar nxënësve dhe mësuesve një vit të suksesshëm shkollor, me besimin se investimi në arsim dhe edukim mbetet një prej faktorëve të rëndësishëm për zhvillimin individual dhe riintegrimin shoqëror.
