Giorgio Armani, stilisti legjendar italian që ndryshoi botën e modës dhe na mësoi se eleganca nuk kalon kurrë, ka ndërruar jetë sot në moshën 91 vjeç. Në momentet e fundit ai u shoqërua nga familja dhe bashkëpunëtori i tij i ngushtë Leo Dell’Orco, pas 20 vitesh bashkëpunim.
Lajmi ka tronditur botën e modës. Armani punoi deri në fund, duke përfshirë njoftimin për blerjen e restorantit të njohur “La Capannina” dhe kontrollimin e pamjeve të koleksionit të tij të 50-vjetorit, që do të prezantohet në Javën e Modës këtë shtator. Pak javë më parë, një infeksion në mushkëri e kishte detyruar të shtrohej në spital, por ai vazhdoi të kujdeset për familjen dhe projektet e tij.
Fillimet nga Piacenza dhe Milano
Armani lindi më 11 korrik 1934 në Piacenza dhe u rrit nën kujdesin e nënës Maria, nga e cila mori ndjesinë për klas dhe shije të sofistikuar. Pas Luftës së Dytë Botërore, ai u transferua në Milano ku studionte mjekësinë, një njohuri që më vonë ndikoi në krijimet e tij të modës. Filloi karrierën në La Rinascente në vitin 1957 dhe më pas bashkëpunimi me Nino Cerruti dhe takimi vendimtar me Sergio Galeotti në vitet 1960, shënuan fillimin e rrugëtimit drejt perandorisë globale të modës.
1975: Lindi marka Giorgio Armani
Në vitin 1975, Giorgio Armani themeloi markën e tij, duke sjellë një qasje të re: dekonstruktimi i xhaketave, lehtësimi i pantallonave dhe adaptimi i rrobave për gratë dhe burrat ndryshuan botën e modës. Suksesi ndërkombëtar erdhi me dizajnin për filmin “American Gigolo” dhe shfaqjen në kopertinën e Time në 1982.
Ai ndërtoi një perandori të plotë modës: Emporio Armani, EA7, parfumet, hotelet, ekspozitat dhe shtëpitë luksoze, duke bërë që marka të mbetet simbol i elegancës dhe sofistikimit.
Tranzicioni pas humbjes së Sergio Galeotti-t
Vdekja e partnerit të tij Sergio Galeotti në 1985 ishte një moment i vështirë, por Armani mori përsipër menaxhimin e plotë të kompanisë, duke e bërë markën e tij një perandori globale dhe duke treguar se ishte jo vetëm stilist, por edhe sipërmarrës i jashtëzakonshëm.
Në vitet e fundit, Armani përcaktoi trashëgiminë e tij, duke përfshirë mbesën Silvana Armani dhe bashkëpunëtorin e tij Leo Dell’Orco, për të siguruar vazhdimësinë e vizionit dhe stilit të tij.
Trashëgimia e një legjende
Giorgio Armani la pas një markë koherente dhe të respektuar, gjithmonë e fokusuar tek eleganca dhe stili i vërtetë. Ai gjithmonë theksonte:
“Stili është elegancë, jo ekstravagancë. Gjëja e rëndësishme nuk është të vihesh re, por të mbahesh mend.”
Armani nuk ishte vetëm një stilist; ai ishte simbol i përkushtimit, pasionit dhe vizionit, duke ndryshuar përgjithmonë botën e modës dhe jetën e miliona njerëzve në të gjithë globin.
