Shërbimi i Neurokirurgjisë në Qendrën Spitalore Universitare “Nënë Tereza” në Tiranë është pajisur me mikroskopin digjital “Aesculap Aeos”, që zëvendëson pajisjen e mëparshme dhe sjell një nga teknologjitë më të avancuara për kirurgjinë e trurit dhe të shtyllës kurrizore.
Ministrja e Shëndetësisë dhe Mbrojtjes Sociale, Albana Koçiu, e shoqëruar nga drejtori i QSUT, Florenc Spaho, vizitoi shërbimin dhe u njoh nga afër me përfitimet që sjell ky investim për mjekët dhe pacientët. Koçiu theksoi se investimi rrit sigurinë dhe efikasitetin e ndërhyrjeve kirurgjikale, duke shërbyer gjithashtu si mjet i vlefshëm trajnimi për mjekët e rinj, të cilët mund të ndjekin operacionet në kohë reale nga monitori.
Sipas ministres, vetëm gjatë vitit 2024, në këtë shërbim u kryen rreth 1700 ndërhyrje, ku rreth 30% e tyre kërkonin përdorimin e mikroskopit. “Më vjen mirë që ofrojmë një teknologji të tillë të fjalës së fundit që shërben edhe për ndërhyrjet e trurit. Statistikisht, nga 1700 ndërhyrjet e kryera, 600 u realizuan me mikroskopin optik të mëparshëm”, tha Koçiu.
Neurokirurgu Artur Xhumari sqaroi se mikroskopi i ri është robotik dhe digjital, një hap i madh krahasuar me pajisjen mekanike dhe optike të mëparshme. “Rreth 25% e ndërhyrjeve kërkojnë mikroskop. Ai ka ndriçim infrared dhe ultraviolet që na lejon të shohim arteriet dhe tumorët e vegjël, duke rritur saktësinë e operacioneve dhe jetëgjatësinë e pacientëve,” u shpreh dr. Xhumari.
Drejtori i QSUT, Florenc Spaho, vuri në dukje se Tirana është e vetmja qytet në Ballkanin Perëndimor me këtë pajisje të avancuar. “Ky mikroskop lejon që mjekët e rinj të ndjekin ndërhyrjet në kohë reale, të japin konsulencë dhe të mësojnë drejtpërdrejt nga operacionet,” shtoi ai.
Ky investim shënon një hap të rëndësishëm në përmirësimin e shërbimeve kirurgjikale në vend dhe në avancimin e mjekësisë shqiptare në standardet ndërkombëtare.