TIRANË , 27 gusht 2026/Albania Express News/-Egnatia ka humbur një mundësi të artë për të shkruar historinë në Europë. Kampionët e Shqipërisë u mposhtën 2-1 nga Lillestrom në Norvegji, në një ndeshje dramatike që u vendos vetëm pas kohës së rregullt dhe shtesës.
Skuadra e Nevil Dedes e nisi në mënyrën më të mirë të mundshme dhe kaloi në avantazh në minutën e 33-të, me Sotën, i cili përfitoi nga një asist i Fernandos pas një goditjeje këndi.
Egnatia e mbylli pjesën e parë në avantazh dhe për një kohë të gjatë dukej se ishte shumë pranë kualifikimit për në fazën e ligës së Europa League.
Megjithatë, Lillestrom reagoi në pjesën e dytë dhe në minutën e 82-të gjeti golin e barazimit me Moen Fos, pas asistit të Ibrahimajt.
Koha e rregullt u mbyll në barazim 1-1, duke e dërguar sfidën në shtesë.
Në minutat shtesë, Egnatia pati mundësitë e saj për të rikthyer avantazhin, por nuk arriti të tregohej cinike përpara portës.
Kur dukej se ndeshja po shkonte drejt një tjetër skenari, erdhi goditja e madhe për kampionët shqiptarë.
Në minutën e 94-t, Olsen shënoi golin e dytë për Lillestrom, duke përmbysur rezultatin dhe duke vendosur skuadrën norvegjeze në avantazh.
Egnatia tentoi të reagonte deri në fund, por nuk arriti të gjente golin që do ta rikthente në garë.
Kështu, aventura e kampionëve shqiptarë në këtë fazë të Europa League përfundon me një humbje dramatike 2-1, pas një përmbysjeje që erdhi në minutat e fundit.
Megjithatë, Egnatia nuk largohet duarbosh nga Europa. Pas eliminimit nga gara për fazën e ligës së Europa League, rrogozhinasit do të vazhdojnë aventurën europiane në Conference League.
REZULTATI:
LILLESTROM 2-1 EGNATIA
Foss 82′, Olsen 94′ / Sota 33′