Klubi i Elbasanit ka reaguar pas ndeshjes, duke i dërguar një kërkesë zyrtare Federatës Shqiptare të Futbollit për të marrë sqarime mbi situatën. Burime të sigurta për “Albania Express News” konfirmojnë se kërkesa thekson se vendimi i marrë ka qenë vendimtar dhe në kundërshtim me rregulloren.
Në dokument, klubi i ka bërë të ditur FSHF-së edhe rregulloren përkatëse, duke kërkuar një interpretim zyrtar të situatës. Megjithatë, rezultati i sfidës në Rrogozhinë nuk mund të ndryshohet, por Elbasani insiston që episodi të marrë vëmendjen e duhur nga organet drejtuese të futbollit shqiptar.
Drejtuesit e verdhebluve kërkojnë transparencë dhe qartësi në interpretimin e rregullave, për të shmangur precedentë që mund të cënojnë garën. Po ashtu, ata shpresojnë që rasti të shërbejë si shembull për përmirësimin e arbitrimit në ndeshjet e ardhshme.
Tashmë mbetet për t’u parë nëse FSHF do të reagojë me një qëndrim zyrtar për rastin, i cili është kthyer në një nga temat më të diskutuara të javës në futbollin shqiptar.
