CËRRIK ,16 gusht 2026/Albania Express News/- Situata të shpeshta të rënies së zjarreve janë shënuar gjatë kësaj vere në territorin e bashkisë Cërrik, duke vënë në angazhim të vazhdueshëm shërbimin zjarrfikës.
Një tjetër vatër zjarri është shfaqur mesditën e kësaj të diele në qytetin e Cërrikut, në Lagjen Nr. 1, ku një parcelë me sipërfaqe të konsiderueshme me ullinj është përfshirë nga flakët.
Zjarri është konstatuar rreth orës 12:45, ndërsa për shkak të përmasave të tij dhe afërsisë me zona të banuara, në terren janë angazhuar forca dhe mjete të shumta të MZSH-së së Bashkisë Cërrik.
Flakët kanë përfshirë një sipërfaqe me ullinj në zonën periferike të qytetit. Pranë parcelës ndodhen edhe banesa, çka ka rritur shqetësimin për përhapjen e zjarrit, veçanërisht për shkak të temperaturave të larta dhe kushteve të favorshme për përhapjen e flakëve.
Falë ndërhyrjes së shërbimeve zjarrfikëse, situata aktualisht është nën kontroll dhe po punohet për shuarjen e plotë të vatrave dhe për të parandaluar riaktivizimin e zjarrit.
Deri në këto momente nuk raportohet për persona të lënduar, ndërsa mbetet për t’u përcaktuar sipërfaqja e saktë e dëmtuar dhe shkaku i rënies së zjarrit.
Shërbimet zjarrfikëse vijojnë monitorimin e zonës për të shmangur çdo rrezik të përhapjes së flakëve drejt banesave apo sipërfaqeve të tjera me bimësi.
