KOSOVË,08 gusht 2026 / Albania Express News/-KF Ulpiana po përgatitet për një kapitull të ri, me drejtues të rinj dhe një objektiv të qartë sportiv: rikthimin në Ligën e Parë të Kosovës.
Presidenti i Federatës së Futbollit të Kosovës, Agim Ademi, ka pritur në takim pronarët e rinj të klubit, Alban dhe Arben Dragaqina, si dhe presidentin e ri të Ulpianës, Fitim Dragaqina.
Në takimin e zhvilluar me drejtuesit e rinj, Ademi është njohur nga afër me projektin dhe vizionin e tyre për ristrukturimin e klubit. Synimi është ndërtimi i një strukture më të fortë dhe krijimi i një projekti ambicioz që do t’i rikthejë Ulpianës protagonizmin në futbollin kosovar.
“Sot pata kënaqësinë të pres në takim pronarët e rinj të KF Ulpiana, Alban dhe Arben Dragaqina, si dhe presidentin e ri të klubit, Fitim Dragaqina. U njoftova nga afër me vizionin dhe planet e tyre për ristrukturimin e klubit, me synimin e qartë për rikthimin e Ulpianës në Ligën e Parë”, deklaroi Agim Ademi.
Kreu i FFK-së vlerësoi gjithashtu gatishmërinë e drejtuesve të rinj për të investuar në zhvillimin e klubit.
“I përgëzoj për angazhimin dhe gatishmërinë për të investuar në zhvillimin e klubit, duke u uruar shumë suksese në realizimin e objektivave të tyre”, u shpreh Ademi.
Me një pronësi të re, drejtim të ri dhe ambicie të qarta, Ulpiana synon të ndërtojë një ekip konkurrues dhe të nisë rrugëtimin drejt rikthimit në Ligën e Parë.
Tashmë topi është në fushën e drejtuesve të rinj, të cilët kanë marrë përsipër një mision të qartë: ta rikthejnë Ulpianën aty ku synojnë të jenë.