Automotoparku i Elbasanit po ngrihet si një kompleks sportiv ndërkombëtar sipas standardeve më të larta të FIA dhe FIM, duke hapur rrugën për zhvillimin e garave më prestigjioze të motorsportit, përfshirë edhe Formula 1.
Kryeministri Edi Rama publikoi sot në rrjetet sociale pamje nga kantieri i ndërtimit, duke theksuar se projekti po avancon me ritme të shpejta dhe tashmë po merr formë konkrete.
Sipas tij, ky investim strategjik do të sjellë një transformim të rëndësishëm në shërbimet e automotorizimit dhe në infrastrukturën sportive e turistike të vendit.
Automotoparku, cirkuiti i parë motorsportiv në Shqipëri, po ndërtohet pranë lumit Shkumbin dhe do të shërbejë si një platformë ultramoderne për garat automobilistike dhe motorike, duke çelur një epokë të re zhvillimi jo vetëm për Elbasanin, por për gjithë vendin.
Ky projekt ambicioz pritet ta shndërrojë Shqipërinë në epiqendrën e rajonit për sportet motorike dhe eventet ndërkombëtare të niveleve më të larta, duke tërhequr mijëra të apasionuar pas Formula 1 nga e gjithë bota.
