BOTËRORI 2026, 7 korrik 2026/Albania Express News/-Në Portugali, shumë zëra e duan atë jashtë Kombëtares pas disfatës kundër Spanjës në fazën e 1/8-ave: “E kam ndërgjegjen të qetë.
Mund të bënim më mirë, por u eliminuam nga një skuadër shumë e mirë,” u shpreh ai, ndërsa mbetet ende e hapur ideja për të vazhduar deri në Evropianin e ardhshëm.
Ndeshja sapo ka përfunduar dhe Cristiano Ronaldo ecën me kokën ulur në fushë. E përshkon atë, pa guxuar njeri ta përqafojë: e lënë të vetëm në “zinë” e tij. Në një moment, spanjolli Rodri, i cili ashtu si ai është një fitues i Topit të Artë, e godet lehtë në gjoks për ta ngushëlluar. Është një skenë e trishtë, në një ditë të trishtë, për një nga lojtarët më të mirë të të gjitha kohërave; më i miri i të gjitha kohërave për vetë-proklamim, edhe pse kjo nuk ndahet nga e gjithë bota. Cristiano Ronaldo ka shënuar dhe ka humbur në gjashtë Botërore nga gjashtë të luajtur, dhe ky është i fundit. A është e mundur të jetë edhe ndeshja e tij e fundit me Kombëtaren? Gjasat janë, por në Portugali shumë mendojnë se ai do të vazhdojë edhe për dy vite të tjera. Këtë do ta vendosë më vonë, pasi vetëm 24 orë më parë kërkoi me ngulm të mos e nxitojnë me pyetje.
“Jam i trishtuar, por siç e thashë dje, dhashë gjithçka,” komentoi ai në fund. “E kam ndërgjegjen të qetë. Mund të bënim më mirë, por u eliminuam nga një skuadër shumë e mirë. Dhashë maksimumin. Po, ishte Botërori im i fundit, tani do të mendoj për të ardhmen me familjen, kështu është jeta. Nuk dua të marr vendime gjaknxehtë. Nesër do të zgjohem i qetë, ashtu si sot. Kam fituar tre tituj me Portugalinë dhe jam i lumtur. Më i rëndësishmi mbetet ai i vitit 2016; Evropiani për mua ka peshën e një Botërori.”
Një fund i trishtë Botërori i tij i gjashtë është i trishtë, sepse Cristiano nuk është më CR7-a i dikurshëm, sulmuesi robotik me muskuj të hekurt dhe vullnet të palëkundur. Kishte një kohë kur dukej se mund të shënonte kurdo që donte, sidomos në ndeshjet e rëndësishme, veçanërisht në Champions. I vetmi njeri i autorizuar ta shihte Leo Messin sy më sy, si i barabartë me të barabartin. Por jeta ndryshon dhe njeriu plaket. Ronaldo, në moshën 41-vjeçare, ende di të shënojë, ende mund të luajë në nivele të larta, por ka qenë tepër i fortë në të shkuarën për të përballuar krahasimin me atë që është sot. Ka humbur atë shkëndijë shpejtësie, dhe si mund të ndodhte ndryshe? Gjatë ndeshjes pati një moment kur provoi një përshpejtim, kaloi mes tre lojtarëve, por u ndal. Diçka që u ndodh të gjithëve, përveç 2-3 apo 4 lojtarëve më të mirë në botë në këtë moment. Problemi është se Ronaldo ka qenë mes atyre 3-4 më të mirëve në botë për plot njëzet vite radhazi.
Fjalët e trajnerit Trajneri Roberto Martinez, në konferencën për shtyp, i bëri homazh yllit të tij: “Cristiano Ronaldo, për mua, ka qenë një shembull, jo vetëm për golat dhe asistet. Ne duhet ta festojmë atë. Po flasim për një ikonë të futbollit. Ëndrra e tij ishte të fitonte Botërorin dhe ai e provoi. Është një shembull i jashtëzakonshëm, edhe në rrafshin njerëzor, si burrë, dhe jo vetëm si sportist.” Trajneri nuk e zëvendësoi as këtë herë, duke i hedhur paksa benzinë zjarrit të diskutimeve në Portugali: a është CR7 një aset apo një barrë për ekipin? Ishte ndeshja e tij e fundit në atë skenë dhe Martinez e la të luante deri në sekondën e fundit.
Historia e tij në Botërore Cristiano është golashënuesi më i mirë i të gjitha kohërave për një Kombëtare – jo vetëm të tijën, por absolute dhe i vetmi që ka shënuar në gjashtë Botërore. Ai numëron 146 gola në 233 ndeshje dhe është një nga katër lojtarët në historinë e futbollit me 200 e sipër paraqitje për ekipin përfaqësues. Këto shifra do të mbeten përgjithmonë, pavarësisht se çfarë mund të mendohet për të. Megjithatë, ndeshja në Dallas konfirmon se marrëdhënia e tij me Kupën e Botës është mjaft e ndërlikuar. Do të mbetet i vetmi trofe i ndjekur dhe i paarritur kurrë.
Cristiano luajti Botërorin e tij të parë në Gjermani në vitin 2006 dhe, në moshën 21 vjeç e 132 ditë, u bë shënuesi më i ri në historinë e Portugalisë në një fazë finale. Atë vit pati përplasjen e famshme me Rooney-n, u vërshëllye, por arriti në gjysmëfinale. Asokohe luante ende me numrin 17 në shpinë. Në vitin 2010, ai shënoi vetëm ndaj Koresë së Veriut në fazën e grupeve, dhe Portugalia doli në 1/8-at, duke humbur 1-0 pikërisht kundër Spanjës. Ju duket e dëgjuar? Në vitin 2014, ai e mori Portugalinë për dore drejt fazës finale duke shënuar 4 gola spektakolarë në play-off kundër Suedisë, por u eliminua trishtueshëm në grupe pas përballjeve me Gjermaninë dhe SHBA-në. Në tre ndeshje, vetëm një festim që s’vlejti për shumëçka. Në vitin 2018, tre gola në atë barazim epik 3-3 mes Spanjës dhe Portugalisë në grup, ndoshta performanca e tij më e mirë në një Botëror, por që u pasua sërish nga eliminimi në 1/8-at, këtë herë nga Uruguai. Çfarë mbetet tjetër? Mbetet viti 2022 në Katar, Botërori i tij më i dobët, me Portugalinë të eliminuar nga Maroku dhe ai i ndalur në vetëm një gol, ndërsa rivali i tij i përjetshëm, Messi, luante, shënonte dhe ngrinte Kupën.
Një histori e gjatë në Kupën e Botës; një histori epike, por më shumë e trishtë sesa e lumtur.