Emma Mazzenga, 92-vjeçare nga Padova, vazhdon të thyejë barrierat e moshës dhe të jetë një shembull i jashtëzakonshëm i formës fizike. Me 11 tituj botërorë, 31 tituj evropianë dhe 115 tituj italianë, ajo ka vrapuar pothuajse gjithë jetën, ndërsa riktheu garimin në moshën 53-vjeçare. Trupi dhe forma e saj fizike janë studiuar edhe në universitete si Marquette në Milwaukee dhe Universiteti i Pavias.
Rutina e përditshme
Emma nis ditën herët, duke bërë kafe në orën pesë dhe duke lexuar disa minuta para mëngjesit. Pas një sanduiçi me proshutë, ajo del për pazarin ose për të bërë pak pastrim. Pasdite kalon duke lexuar, duke shkuar në kinema, klubin e librit ose duke takuar miqtë, ndërsa stërvitja mbetet pjesë e pandarë e ditës. Mbrëmjet kalojnë me televizor dhe shtrat rreth orës 23:00.
Ushqimi dhe aktiviteti fizik
“Pak nga çdo gjë. Tani kufizoj porcionet,” thotë ajo. Drekën e përbëjnë 30-40 gram makarona ose oriz, të ndjekura nga një pjatë e dytë dhe perime të gatuara. Alternon mishin dhe peshkun, ndërsa darka është më e lehtë: disa perime dhe një copë djathë. Çdo ditë pi gjysmë gote verë të kuqe në drekë dhe gjysmën tjetër në darkë.
Vrapi mbetet pjesë kyçe e jetës së saj: “Jeta ime nuk ka qenë kurrë sedentare. Edhe gjatë Covid-it vrapoja në korridorin e shtëpisë. Pas një ore stërvitje, ndihem shumë mirë,” shprehet ajo.
Fitimet dhe motivimi
Edhe në moshë të avancuar, Emma vazhdon të thyejë rekorde. Në janar 2024 vendosi një rekord botëror në 200 metra për kategorinë W90 dhe në qershor e përmirësoi kohën me më shumë se një sekondë. “Do të doja t’u thoja të gjithëve: nuk është kurrë vonë!”
Për Emma-n, vrapi dhe aktiviteti fizik nuk janë vetëm sport, por edhe një mënyrë për të qëndruar të lidhur me të tjerët dhe për të ruajtur mirëqenien: “Zgjohu nga divani. Mos qëndro kurrë i mbyllur në shtëpi për një ditë të tërë. Kjo sjell trishtim dhe nuk ndihmon as mendjen dhe as trupin,” këshillon ajo.
Emma Mazzenga është një shembull i gjallë që kurrë nuk është vonë për të nisur lëvizjen dhe për të jetuar një jetë aktive dhe të shëndetshme, pavarësisht moshës.