BOTËRORI 2026 ,21 qershor 2026/Albania Express News/Gjermania siguroi kualifikimin në fazën me eliminim direkt, pasi mposhti Bregun e Fildishtë me një përmbysje spektakolare në Grupin E. Skuadra gjermane tregoi karakter dhe forcë reagimi, duke arritur një fitore të merituar që e ngjit në krye të grupit me gjashtë pikë.
Heroi i mbrëmjes ishte Deniz Undav. I aktivizuar nga stoli, sulmuesi gjerman realizoi dy gola vendimtarë dhe udhëhoqi skuadrën drejt suksesit. Kontribut të rëndësishëm dha edhe Nadiem Amiri me një asist, ndërsa Leon Goretzka spikati në një moment kyç në mbrojtje, që rezultoi po aq i vlefshëm sa një gol.
Pas ndeshjes, trajneri i Gjermanisë vlerësoi paraqitjen e ekipit dhe ndikimin e futbollistëve që hynë gjatë lojës. Sipas tij, skuadra pati vetëm disa minuta të vështira në fillim, por më pas mori kontrollin e takimit dhe tregoi cilësitë e saj.
“Po, jam shumë i lumtur që në fund arritëm ta fitonim ndeshjen – dhe që e merituam fitoren. Ekipi bëri një përpjekje të jashtëzakonshme. Jam jashtëzakonisht i kënaqur për të gjithë skuadrën, sepse ata – ose më saktë, të gjithë – mund të shohin se janë një pjesë e rëndësishme e saj. Lojtarët që hynë nga stoli ishin ata që vendosën ndeshjen”, theksoi ndër të tjera tekniku Nagelsmann.
Atmosfera në stadium, por edhe në sheshet kryesore të Torontos ishte elektrizuese. Tifozët gjermanë festuan një fitore që i afron më shumë me objektivat e tyre në turne, ndërsa mbështetësit e Bregut të Fildishtë shprehën krenarinë për luftën dhe shpirtin garues të ekipit të tyre, pavarësisht disavantazheve.
Me këtë rezultat, Gjermania kualifikohet matematikisht në raundin e 32 skuadrave më të mira, për herë të parë që nga triumfi i saj në vitin 2014. Në ndeshjen e fundit të grupit, gjermanët do të përballen me Ekuadorin, ndërsa Bregu i Fildishtë do të kërkojë kualifikimin ndaj Curaçaos.