ELBASAN,5 qetshor 2026/Albania Express News/Një protestë qytetare u zhvillua këtë të premte pasdite në qendër të qytetit të Elbasanit, ku dhjetëra pjesëmarrës mes te cileve edhe mjaft të vegjël u mblodhën për të shprehur kundërshtimin e tyre ndaj planit për ndërtimin e një resorti luksoz në zonën e Zvërnecit.
Me flamuj kuqezi në duar dhe pankarta kundër projektit, protestuesit marshuan dhe qëndruan në sheshin qendror të qytetit, duke artikuluar shqetësimet e tyre për ndikimin që, sipas tyre, ky investim mund të ketë mbi mjedisin dhe pasuritë natyrore të zonës bregdetare.
Gjatë protestës u dëgjuan thirrje të ndryshme politike, mes tyre “Dorëheqje”, “Dorëheqje”, Dorëheqje” “Rama në burg”,, “Berisha në burg”…si dhe slogane të tjera drejtuar kundër figurave kryesore të politikës shqiptare. Atmosfera u karakterizua nga pjesëmarrja aktive e qytetarëve, të cilët kërkuan më shumë transparencë dhe konsultim publik për projektet që prekin zonat e mbrojtura dhe hapësirat natyrore të vendit.
Kjo është hera e parë që në Elbasan organizohet një protestë e tillë kundër planit për ndërtimin e resortit në Zvërnec, një projekt që ka ngjallur debat të gjerë publik në nivel kombëtar. Organizatorët deklaruan se synimi i tyre është sensibilizimi i opinionit publik për mbrojtjen e mjedisit dhe ruajtjen e pasurive natyrore, ndërsa paralajmëruan se do të vijojnë me aktivitete të tjera kundërshtuese nëse kërkesat e tyre nuk merren parasysh.
Protesta u zhvillua pa incidente dhe nën monitorimin e forcave të policisë, të cilat garantuan mbarëvajtjen e tubimit.
