ELBASAN, 4 qershor 2026/Albania Express News/Këshilli Bashkiak i Elbasanit ka propozuar gjatë mbledhjes së radhës e cila u zhvillua këtë mesjavë , dhënien e titullit më të lartë vendor, “Qytetar Nderi i Elbasanit”, për ish-kryetarin e Bashkisë, Qazim Sejdini, pas vdekjes.
Ky vlerësim vjen si një shenjë mirënjohjeje institucionale dhe qytetare për kontributin e tij të jashtëzakonshëm në zhvillimin, transformimin dhe promovimin e Elbasanit, si dhe për përkushtimin e tij shumëvjeçar në shërbim të qytetarëve dhe interesit publik.
Sipas projekt-vendimit të paraqitur për shqyrtim, titulli mbështetet në legjislacionin përkatës për dhënien e titujve të nderit dhe është hartuar pas analizës së detajuar të veprimtarisë së ish-kryebashkiakut nga strukturat përgjegjëse të Bashkisë së Elbasanit.
Motivacioni zyrtar me të cilin u propozua nderimi i figurës së tij është:
“Për kontributin e jashtëzakonshëm në zhvillimin, transformimin dhe promovimin e qytetit të Elbasanit, si dhe për përkushtimin e palëkundur në shërbim të qytetarëve dhe interesit publik.”
Vendimi parashikon që administrata dhe Kryetari i Bashkisë së Elbasanit të ngarkohen me zbatimin e tij, ndërsa ai do të hyjë në fuqi 10 ditë pas shpalljes.
NJË EMËR QË SHËNOI NJË EPOKË NË ELBASAN
Qazim Sejdini mbetet figura më jetëgjatë në drejtimin e Bashkisë së Elbasanit gjatë periudhës së demokracisë dhe një nga emrat më të spikatur të historisë 120-vjeçare të qeverisjes vendore të qytetit.
I lindur më 12 shkurt 1951 në Elbasan, ai ndërtoi një karrierë të gjatë në arsim, sport, administratë dhe qeverisje publike. Pas studimeve në Universitetin “Luigj Gurakuqi” të Shkodrës dhe më pas në Universitetin “Aleksandër Xhuvani” të Elbasanit, Sejdini shërbeu si mësues në Labinot-Mal, përpara se të angazhohej në drejtimin e sportit dhe institucioneve lokale.
Në vitet që pasuan ai mbajti poste të rëndësishme si President i Dhomës së Tregtisë dhe Industrisë së Elbasanit, President i Unionit të Dhomave të Tregtisë dhe Industrisë së Shqipërisë, President i Shoqatës së Doganierëve dhe Prefekt i Qarkut të Elbasanit.
Në mars të vitit 2007 ai u zgjodh për herë të parë Kryetar i Bashkisë së Elbasanit, duke marrë detyrën në maj të po atij viti. Ai do ta drejtonte bashkinë e Elbasanit , një ndër më të mëdhatë e Shqipërisë për tre mandate radhazi, deri në vitin 2019, duke u bërë kryebashkiaku më jetëgjatë në historinë moderne të Elbasanit.
TRANSFORMIMI I QYTETIT DHE RILINDJA URBANE
Periudha e drejtimit të Bashkisë nga Qazim Sejdini konsiderohet nga shumë qytetarë dhe specialistë si një prej etapave më intensive të investimeve dhe transformimit urban të Elbasanit.
Gjatë mandateve të tij u realizuan projekte infrastrukturore me ndikim të gjerë publik, investime në rrugë, hapësira publike, sheshe, parqe, institucione arsimore dhe objekte sportive, duke ndryshuar ndjeshëm pamjen dhe funksionalitetin e qytetit.
Po aq e rëndësishme ishte edhe vëmendja ndaj trashëgimisë historike e kulturore, promovimit të turizmit dhe forcimit të identitetit qytetar të Elbasanit.
Një nga momentet më kulmore të kësaj periudhe ishte viti 2009, kur Elbasani u vlerësua në Lugano të Zvicrës me çmimin ndërkombëtar “Destination to be Discovered”, duke u futur për herë të parë në hartën turistike botërore si një destinacion me potencial të jashtëzakonshëm historik, kulturor dhe turistik.
Ky vlerësim evidentoi trashëgiminë mbi 2000-vjeçare të qytetit, ndërthurjen e qytetërimeve romake, bizantine dhe osmane, si dhe rolin e Elbasanit si qytet i dijes, kulturës dhe bashkëjetesës.
NJË MBROJTËS I HARMONISË DHE BASHKËJETESËS
Përtej investimeve dhe projekteve urbane, Qazim Sejdini kujtohet si një nga mbështetësit më të vendosur të harmonisë fetare dhe dialogut qytetar.
Ai besonte se qytetet nuk ndërtohen vetëm me beton dhe asfalt, por mbi respektin, mirëkuptimin dhe bashkëpunimin mes njerëzve.
Një nga kontributet më të rëndësishme në këtë drejtim ishte mbështetja për rindërtimin e Xhamisë së Ballies, një simbol historik dhe shpirtëror i Elbasanit, e shkatërruar gjatë regjimit komunist.
Falë bashkëpunimit me Komunitetin Mysliman dhe partnerët ndërkombëtarë, projekti u realizua dhe objekti u rikthye si një nga veprat më të spikatura të arkitekturës fetare moderne në Shqipëri.
VLERËSIME NDËRKOMBËTARE
Kontributi i tij nuk kaloi pa u vlerësuar edhe jashtë kufijve të Shqipërisë.
Në vitin 2013, në Shtetet e Bashkuara të Amerikës, Qazim Sejdini u nderua me “Çelësin e Qytetit” të Idaho-s dhe me titullin “Qytetar Nderi” të qytetit Pensacola në Florida, në vlerësim të rolit të tij në forcimin e bashkëpunimit ndërkombëtar dhe promovimin e dialogut ndërkulturor.
NJË KRYEBASHKIAK PRANË NJERËZVE
Ajo që qytetarët kujtojnë më shumë nga figura e tij është afërsia me njerëzit.
Dyert e Bashkisë ishin të hapura për këdo që kërkonte ndihmë, zgjidhje apo dëgjesë. Ai e konsideronte pushtetin vendor si shërbim ndaj komunitetit dhe jo si privilegj personal.
Pikërisht kjo qasje i siguroi besimin e qytetarëve për tre mandate radhazi dhe e bëri një nga figurat më popullore të jetës publike elbasanase.
Pas largimit nga drejtimi i Bashkisë në vitin 2019, Sejdini deklaroi publikisht se e konsideronte të përmbushur misionin e tij dhe se ishte koha që stafetën t’ia linte brezit të ri. Që prej asaj kohe Bashkia e Elbasanit drejtohet nga Gledian Llatja.
NJË TRASHËGIMI QË MBETET NË KUJTESËN E QYTETIT
Më 12 qershor 2024, Qazim Sejdini u nda nga jeta pas një sëmundjeje të rëndë, duke lënë pas një trashëgimi të gjerë në jetën politike, institucionale dhe shoqërore të Elbasanit.
Me propozimin për t’i akorduar titullin “Qytetar Nderi i Elbasanit”, institucionet vendore synojnë të përjetësojnë kontributin e një figure që për më shumë se një dekadë ishte pjesë e pandashme e historisë së qytetit.
Për shumë elbasanas, Qazim Sejdini nuk do të kujtohet vetëm si kryebashkiaku më jetëgjatë, por si drejtuesi që lidhi emrin e tij me një epokë transformimi, zhvillimi dhe modernizimi të Elbasanit, duke lënë gjurmë të pashlyeshme në historinë e kryeqendrës së Shqipërisë së Mesme.Ndërkohë zj.Imelda Sejdini , këshilltare e PS në Këshillin Bashkiak ,vajza e ish Kryebashkiakut Qazim Sejdini u shpreh e emocionuar dhe falënderuese për kolegët për marrjen e vendimit unanim për akordimin e titullit të lartë “Qytetar Nderi i Elbasanit ” për babain e saj .Ajo falënderoi edhe të gjithë qytetarët e Elbasanit për respektin dhe vlerësimin që i kanë bërë dhe që i bëjnë punës së jashtëzakonshme ndër vite nga Qazim Sejdini gjatë gjithë periudhës që elbasanasit i besuar atij drejtimin e Elbasanit.
