DURRËS,29 maj 2026/Albania Express News/Deputeti socialist Olsi Komici ka ndarë momente nga pjesëmarrja e tij në konferencën e zhvilluar në Durrës me temë “Mbi Reformën në Drejtësi, Rolin e Parlamenteve dhe Forcimin e Shtetit të së Drejtës”, ku ai kishte rolin e moderatorit të aktivitetit.
Në këtë konferencë morën pjesë përfaqësues nga Rumania dhe Moldavia, pjesë e komisioneve të ligjeve dhe institucioneve të pavarura të drejtësisë, ndërsa fokusi kryesor i diskutimeve ishte shkëmbimi i eksperiencave dhe praktikave më të mira për forcimin e sistemit të drejtësisë dhe shtetit ligjor.
Përmes një postimi në rrjetet sociale, Komici u shpreh i nderuar për pjesëmarrjen në këtë aktivitet, duke theksuar rëndësinë e ndërtimit të një drejtësie të pavarur, të barabartë dhe që gëzon besimin e qytetarëve.
“Diskutojmë problematika dhe shkëmbejmë eksperiencat më të mira me qëllimin kryesor për një drejtësi të pavarur, të barabartë dhe që përmbush besimin e publikut”, shkruan ai.
Deputeti socialist nënvizoi gjithashtu se drejtësia nuk duhet parë thjesht si sistem institucional, por si një proces që ndërtohet çdo ditë përmes besimit dhe transparencës ndaj qytetarëve.
