Kryetari i Bashkisë Elbasan, Gledian Llatja, mori pjesë në konferencën “Të Bashkuar për Klimën”, organizuar nga Ministria e Turizmit dhe Mjedisit dhe GIZ, e fokusuar në forcimin e bashkëpunimit rajonal për përballimin e sfidave klimatike.
Gjatë panelit “Planifikimi i Rrugëve Lokale drejt Përshtatjes dhe Neutralitetit Klimatik”, Llatja ndau eksperiencën e Bashkisë Elbasan në drejtim të planifikimit vendor, mbrojtjes së zonave me rrezik, financimeve të gjelbra dhe përdorimit të zgjidhjeve të bazuara në natyrë për rritjen e qëndrueshmërisë së komuniteteve.
Në fjalën e tij, kryebashkiaku theksoi se veprimi klimatik nis nga niveli vendor dhe se bashkëpunimi mes institucioneve është thelbësor për ndërtimin e qyteteve më të gjelbra, më të sigurta dhe më rezistente ndaj ndryshimeve klimatike.
Konferenca mblodhi përfaqësues të institucioneve vendore e qendrore, organizatave ndërkombëtare dhe ekspertë të mjedisit, me fokus ndarjen e praktikave më të mira dhe forcimin e politikave për zhvillim të qëndrueshëm.