Kukësi vijon të ndërtojë skuadrën për sezonin e ri në Kategorinë e Parë, duke sjellë dy emra interesantë nga tregu ndërkombëtar. Verilindorët kanë zyrtarizuar mbrojtësin brazilian Wilson Filho Junior dhe portierin kolumbian Fabricio Arevalo Menjura, lëvizje që tregojnë ambicien për të rikthyer klubin në elitë.
Wilson Filho Junior, 24 vjeç, vjen nga kampionati brazilian dhe është një lojtar polivalent, i aftë të mbulojë të dy krahët e mbrojtjes. Me shpejtësinë dhe forcën fizike që e karakterizojnë, ai pritet të japë siguri dhe elasticitet në prapavijën e Kukësit.
Ndërkohë, në portë është shtuar konkurrenca me afrimin e Fabricio Arevalo Menjura. 21-vjeçari nga Bogotá, i njohur për refleksin dhe daljet e sigurta, ka spikatur me fanellën e Erzenit në dy sezonet e fundit dhe tashmë kërkon të konfirmojë vlerat e tij te verilindorët.
Dy përforcime me profil ndërkombëtar që sinjalizojnë se Kukësi nuk e sheh Kategorinë e Parë si destinacion të përhershëm, por si një etapë kalimtare drejt rikthimit në Superiore.
albaniaexpress.al