Kryetari i Bashkisë Gramsh, Besian Ajazi, ka marrë pjesë në ceremoninë e shpërndarjes së Çertifikatave të Mirënjohjes për shoqatën për mbrojtjen nga zjarri dhe shpëtimi (AFPRA), si dhe për disa vullnetarë që u angazhuan krah zjarrfikësve profesionistë gjatë zjarreve masive të muajit gusht.
Në këtë aktivitet ishte i pranishëm edhe atasheu për sigurinë i Ambasadës Franceze në Tiranë, duke theksuar rëndësinë e bashkëpunimit ndërinstitucional dhe mbështetjes ndërkombëtare në menaxhimin e emergjencave civile.Përmes një postimi, kryebashkiaku Ajazi shprehu mirënjohjen e tij për shoqatën AFPRA dhe drejtuesin e saj, Alban Laçi, për bashkëpunimin e vazhdueshëm, si dhe për mbështetjen trajnuese dhe logjistike të ofruar ndaj shërbimit zjarrfikës të Gramshit (MNZSH).
“Kontributi i vullnetarëve dhe partnerëve tanë ishte vendimtar në përballimin e situatës së vështirë të zjarreve. Këto vlerësime janë një falënderim i merituar për përkushtimin dhe solidaritetin e treguar,” theksohet në mesazhin e tij.Ceremonia shërbeu edhe si një moment reflektimi mbi rëndësinë e forcimit të kapaciteteve lokale dhe rolit kyç të vullnetarizmit në mbrojtjen e komunitetit dhe mjedisit.
