Një mbrëmje e jashtëzakonshme muzike, elegance dhe kulturë evropiane solli Gala e Operetës Rumune në skenën e Teatrit “Skampa”, duke shënuar hapjen zyrtare të sezonit artistik në qytet.
Në këtë event festiv u zhvillua një performancë unike nga artistë të Teatrit Kombëtar të Operetës dhe Muzikalit “Ion Dacian” i Bukureshtit, të shoqëruar me këngëtaren e dashur për publikun, Eli Fara, e cila solli interpretime të fuqishme me gjurmë arumune dhe shpirt shqiptari. Programi përfshiu arie, duete dhe vepra të njohura që sollën emocione të thella dhe duartrokitje të gjata nga publiku i pranishëm.
Ky aktivitet jo vetëm që shënoi një fillim dinjitoz për sezonin e ri artistik, por edhe forcoi marrëdhëniet kulturore mes Shqipërisë dhe Rumunisë, një nismë e rëndësishme për bashkëpunime të mëtejshme artistike mes dy vendeve tona.
Ndër të ftuarit e nderit ishte edhe Maestro Zhani Ciko, figura e shquar e muzikës shqiptare dhe dirigjent i njohur.
Ky event u prit me entuziazëm nga qytetarët, duke shënuar një fillim inspirues për një sezon plot art, kulturë dhe emocione në Teatrin “Skampa”.