Me rastin e 40-vjetorit të themelimit të Departamentit të Gjuhës Italiane, në Universitetin e Tiranës, po organizohet një konferencë shkencore ndërkombëtare.
Konferenca “40 vjet studime italiane në Universitetin e Tiranës: kujtime, reflektime dhe perspektiva të së ardhmes”, do të zhvillohet edhe gjatë ditës së nesërme, (19 dhe 20 nëntor 2025), si një rast për të festuar historinë, evolucionin dhe rëndësinë e gjuhës dhe kulturës italiane në Universitetin e Tiranës.
Departamenti i Gjuhës Italiane, i çelur në 1984-ën, përmes një postimi në rrjetet sociale bëri të ditur se, ky përvjetor është parë si një mundësi për të reflektuar mbi rezultatet e arritura, për të ndarë përvojat dhe për të planifikuar të ardhmen e bashkëpunimit akademik dhe kulturor.
Në konferencën shkencore ndërkombëtare marrin pjesë pedagogë, ish-pedagogë, studiues, studentë, ish-lektorë, si dhe mjaft pedagogë të universiteteve italiane me të cilat departamenti bashkëpunon prej vitesh.
Prof. as. dr. Mirela Papa, kryetare e Departamentit të Italishtes, bëri prezantimin e çeljes së konferencës, ndërkohë përshëndetën edhe prof. dr. Esmeralda Kromidha, dekane e Fakultetit të Gjuhëve të Huaja, Gentiana Sharku, zëvendës rektore e Universitetit të Tiranës, prof. dr. Sergio Alias, sekretar i parë i Ambasadës Italiane në Tiranë, si dhe dr. Alessandro Ruggera, drejtori i Institutit Italian të Kulturës në Tiranë.