Në fshatin Shalës kanë vijuar me intensitet punimet për asfaltimin e një prej akseve kryesore që lidhet me unazën e fshatit, një investim i rëndësishëm në kuadër të përmirësimit të infrastrukturës rrugore në territorin e Bashkisë.
Kryetari i Bashkisë, Andis Salla, ka ndjekur nga afër ecurinë e punimeve, duke vlerësuar cilësinë e projektit dhe rëndësinë që ka kjo rrugë për lëvizjen e banorëve dhe lidhjen me rrjetin rrugor më të gjerë. Ai theksoi se çdo investim i tillë është pjesë e një vizioni më të gjerë për të modernizuar infrastrukturën në çdo lagje e fshat të bashkisë.
Rruga po realizohet me të gjitha standardet teknike të kërkuara, duke siguruar qëndrueshmëri dhe siguri për të gjithë përdoruesit. Përmirësimi i aksesit rrugor pritet të sjellë lehtësira për banorët dhe zhvillim për zonën.
Ky është një tjetër hap konkret në rrugën e zhvillimit që po ndjek Bashkia, me qëllim krijimin e kushteve më të mira për jetesë dhe qarkullim, si në zonat urbane ashtu edhe në ato rurale.
albaniaexpress.al