Elbasani shpreson ta ruajë kreun e renditjes, ndonëse aktualisht ndan vendin e parë me pikë të barabarta me Vllazninë. Tri fitoret radhazi duket se i kanë dhënë fund asaj mini-krize të para pak javëve dhe atmosfera në skuadër është pozitive. Të dielën, në “Elbasan Arena”, verdheblutë përballen me kampionët në fuqi, Egnatian, një ekip në formë që qëndron vetëm një pikë pas tyre dhe që përbën test të fortë për objektivat e sezonit.
Tifozët elbasanas kanë nisur organizimet për të mbushur shkallët e stadiumit dhe pritet të jenë lojtari i 12-të. Megjithatë, në klub shprehet shqetësimi i vetëm që kjo mbështetje të mos shoqërohet me incidente, pasi Elbasani po përballet prej javësh me një sërë gjobash të majme nga Komisioni i Disiplinës së FSHF-së.
GJOBAT DHE KOSTOT
Sipas një vëzhgimi të “Panorama Sport”, Elbasani është ndëshkuar në gjashtë raste që prej fillimit të kampionatit, me gjoba që variojnë nga 50 mijë deri në 200 mijë lekë, duke arritur një total prej 650 mijë lekësh. Këtyre u shtohen edhe kostot e dëmeve materiale në stadiumet “Loro Boriçi” dhe “Flamurtari”, për shkak të thyerjes së stolave dhe elementëve të tjerë.
Shumica e ndëshkimeve lidhen me ndezjen e flakadanëve dhe mjeteve piroteknike, një fenomen thuajse i pamundur të kontrollohet plotësisht nga klubi, përkundër thirrjeve të vazhdueshme.
Situata po shihet nga shumëkush si një lloj “lufte e ftohtë” mes tifozërisë elbasanase dhe Federatës, ndërsa në fund është klubi ai që paguan faturën. Tashmë mbetet për t’u parë nëse sfida e rëndësishme ndaj Egnatias do të shënojë kthesën edhe në këtë aspekt, me thirrjen e qartë për mbështetje pa pasoja.