Nga Vladimir Mema
Nëse ekziston një simbol i rilindjes së futbollit shqiptar në dekadën e fundit, ai është pa dyshim stadiumi “Elbasan Arena”. I përuruar në vitin 2014 pas një rikonstruksioni tërësor sipas standardeve të UEFA-s, ky impiant modern jo vetëm që ringjalli frymën sportive në qytetin e Elbasanit, por e ktheu atë për shumë vite me radhë në kryeqendrën e futbollit shqiptar, duke mbajtur mbi supe një rol kombëtar dhe ndërkombëtar.
Fillimisht ndërtuar si një shtëpi për ekipin verdheblu, “Elbasan Arena” u kthye shumë shpejt në shtëpinë e Kombëtares Shqiptare. Në kohën kur “Qemal Stafa” doli jashtë standardeve dhe u shemb për t’i lënë vendin “Arenës Kombëtare”, Elbasani mori nën patronazh sfidat më të rëndësishme të kuqezinjve në kualifikueset për Euro 2016. Aty nisi edhe ëndrra franceze, me fitore të paharrueshme dhe stadiumin që u shndërrua në një “fortesë” e vërtetë për Shqipërinë. Tifozët elbasanas dhe ata nga mbarë vendi, krijuan një atmosferë elektrizuese që do të mbetet gjatë në kujtesën e futbollit tonë.
Por roli i “Elbasan Arena” nuk u kufizua vetëm te Kombëtarja. Për shumë vite, ky stadium u bë destinacioni i vetëm i vlefshëm për klubet shqiptare që merrnin pjesë në kupat e Europës, për shkak të mungesës së infrastrukturës në qytetet e tyre. Skënderbeu, Kukësi, Partizani, Laçi, Egnatia dhe shumë të tjera luajtën ndeshje historike europiane në tapetin e gjelbër të Elbasanit, duke pritur kundërshtarë me emër nga e gjithë Europa. Nga fitoret e paharrueshme, “Elbasan Arena” u shndërrua në portën europiane të futbollit shqiptar.
Kjo rëndësi kombëtare dhe ndërkombëtare e stadiumit nuk do të ishte e mundur pa angazhimin e vazhdueshëm të Bashkisë së Elbasanit, e cila në mënyrë sistematike ka investuar për të krijuar një infrastrukturë mbështetëse sa më funksionale përreth impiantit. Nga aksesi i përmirësuar rrugor, te parkimet, ndriçimi dhe siguria, gjithçka është ndërtuar për të ofruar kushte të denja për ngjarje të mëdha sportive. Bashkia ka qenë gjithashtu një mbështetëse e madhe për ekipin lokal, duke e parë stadiumin si një vlerë shumë më të madhe sesa thjesht një objekt sportiv – si një simbol krenarie qytetare dhe zhvillimi urban.
Edhe sot, në një kohë kur stadiume moderne kanë nisur të ndërtohen në qytete të tjera “Elbasan Arena” vazhdon të ruajë statusin e saj të veçantë, falë historisë që ndërtoi, sfidave që priti dhe emocioneve që ofroi. Ajo nuk është më thjesht një stadium – është një pjesë e pandashme e dekadës së artë të futbollit shqiptar, një dëshmi e qartë se kur infrastruktura, pasioni dhe vizioni bashkohen, një qytet mund të bëhet zemra e një kombi.
