Mihal Gjika, ose siç e njeh çdo elbasanas, Lakja, një nga ikonat më të mëdha që ka veshur ndonjëherë fanellën verdheblu, foli me emocione dhe krenari pas fitores së skuadrës ndaj Tiranës. Një emër që nuk është thjesht histori, por frymë, shpirt dhe identitet i futbollit elbasanas – njeriu që e ka ndjerë këtë klub në palcë, në fushë, në zemër, në jetë. Me ton të qetë, por plot besim, ai e vlerësoi këtë fitore në prononcimin e dhënë enkas për “Albania Express News” si një moment të rëndësishëm për ekipin.
“Kjo fitore ka shumë vlera, kjo është fitore morali. Këtyre djemve u duhej një ndeshje e tillë që t’u japë besim dhe t’i motivojë për atë që na pret. Elbasani është skuadër që mund të bëjë më shumë, dhe dje pamë një pjesë të karakterit që duam ta shohim gjithmonë.”
Ai ndaloi edhe te ndeshja e radhës, duke theksuar se gëzimi i fitoreve duhet shoqëruar me kujdes e seriozitet:
“Duhet të jemi të kujdesshëm me Flamurtarin. Është skuadër e uritur për pikë dhe e rrezikshme. Nuk ka ndeshje të lehtë. Çdo ndeshje duhet menduar, përgatitur dhe luajtur me kokë. Ne mund t’ia dalim, por duhet të jemi të përqendruar.”
Ndërkaq, mesazhi i tij më i fortë nuk ishte teknik, por zemër elbasanase e pastër:
“Stadiumi nuk duhet të jetë bosh, sidomos në shtëpi. Mua nuk më bën zemra ta shoh bosh. Duhet të ketë më shumë reklamim, më shumë thirrje, më shumë lëvizje që qyteti të vijë pranë ekipit. Ky ekip është i Elbasanit, është i njerëzve të këtij qyteti. Djemtë kanë nevojë për mbështetje, për duartrokitje, për zë. Vetëm bashkë mund ta çojmë përpara”, mbylli prononcimin e tij Lakja.