Procesi i buxhetimit me pjesëmarrje ka vijuar sot në Njësinë Administrative Labinot-Fushë, ku banorët u njohën me investimet e realizuara gjatë vitit të fundit, si edhe me prioritetet që do të pasqyrohen në planin e investimeve për vitin 2026.
Në këtë takim mori pjesë deputetja Sara Mile, nënkryetari i Bashkisë Elbasan, z. Asim Sula, i cili, së bashku me administratorin e njësisë, prezantuan projektet e kryera duke theksuar mbështetjen e vazhdueshme ndaj zonave rurale.
Gjatë vitit të fundit, Bashkia Elbasan ka investuar në përmirësimin e infrastrukturës rrugore dhe shërbimeve komunitare në të gjithë territorin e njësisë, duke përfshirë asfaltimin e rrugës së lagjes së Spitalit, asfaltimin e rrugëve të brendshme në lagjet Isak, Bucajvër dhe Shkëmbit, si edhe sistemimin dhe pastrimin sistematik të kanaleve ujitëse.
Është realizuar sistemimi i ujërave të zeza në përronin e Larit dhe zonën e pompave Mëngel, rikonstruksioni i qendrës shëndetësore Labinot-Fushë, vendosja e ndriçimit publik në lagje, pastrimi i gurrës së ujit, rehabilitimi dhe asfaltimi i rrugëve Krastë–Ura e Lizës dhe Behxhet Hyti–Mëngel, si edhe rehabilitimi i kanalit ujitës në Mëngel.
Në fshatin Godolesh janë realizuar ndërhyrje për rehabilitimin e rrjetit të ujit të pijshëm, shtrimin me çakull të rrugës Shegunë, vendosjen e ndriçuesve publikë në rrugët kryesore, si edhe vendosjen e koshave të mbeturinave.
Nënkryetari i Bashkisë Elbasan, z. Asim Sula, u shpreh se:
“Bashkia Elbasan është e angazhuar të sjellë investime të prekshme në çdo lagje e fshat. Rritja e cilësisë së jetesës së qytetarëve është prioriteti ynë kryesor dhe buxhetimi me pjesëmarrje garanton që zëri i banorëve të jetë gjithmonë vendimtar në planifikimin e projekteve të reja.”
Procesi i buxhetimit me pjesëmarrje vijon me synimin për të ndërtuar një zhvillim të balancuar dhe për të forcuar bashkëpunimin mes Bashkisë dhe komuniteteve lokale.