Kategoria e Parë ka ulur sot përfundimisht siparin e javës së 8-të, me tre ndeshje ku në fushë zbritën skuadra me objektiva të qartë për ngjitjen në elitë. Spektakli nuk mungoi, pasi Laçi dhe Pogradeci dhuruan “shfaqje” golash, ndërsa Kukësi u ndal sërish në barazim në shtëpi, duke thelluar krizën.
Laçi konfirmoi ritmin e lartë, duke shkatërruar Burrelin me rezultatin e pastër 4-0. Protagonist absolut i takimit ishte Traore, autor i një dopiete, ndërsa Jiakpona dhe Kalaj vulosën suksesin e thellë të kurbinasve, që po qëndrojnë fort në zonën e kreut.
Fitore me të njëjtat shifra regjistroi edhe Pogradeci, që dominoi plotësisht Kastriotin. Golat e Greçës, Piusit, Babtundes dhe Santit i dhanë liqenorëve tri pikë të arta dhe e mbajnë skuadrën e trajnerit Gvozdenoviç në garë të plotë për vendet e para.
Në Kukës, kriza duket se po bëhet shqetësuese. Verilindorët nuk shkuan më shumë se një 2-2 ndaj Luftëtarit, pavarësisht se ishin dy herë në avantazh me Sadiq dhe Dragoshin. Për miqtë shënuan Nyanguila dhe Isteri, duke u dhënë gjirokastritëve një pikë me vlerë, ndërsa Kukësi mbetet ende në kërkim të stabilitetit në kampionat.
Rezultatet përfundimtare – Java 8
-
Kukësi 2–2 Luftëtari
(Sadiq 43′, Dragoshi 45+2′ / Nyanguila 11′, Isteri 45+1′) -
Laçi 4–0 Burreli
(Traore 35′, 66′, Jiakpona 61′, Kalaj 82′) -
Pogradeci 4–0 Kastrioti
(Greca 11′, Pius 55′, Babtunde 62′, Santi 89′)