Shtetet e Bashkuara kanë zbutur tonet lidhur me akuzat e Izraelit se Hamasi ka shkelur marrëveshjen e armëpushimit, pasi nuk ka kthyer të gjitha trupat e pengjeve të vrarë. Deri tani janë dorëzuar vetëm 9 nga 28 trupa, ndërsa Hamasi pretendon se pjesa tjetër ndodhet nën rrënoja në Gaza dhe kërkon kohë dhe pajisje të specializuara për nxjerrjen e tyre.
Dy trupat më të fundit të kthyer të mërkurën janë identifikuar si Inbar Hayman (27 vjeçe), e vrarë gjatë festivalit “Nova” më 7 tetor 2023, dhe rreshteri madhor Muhammad al-Atresh (39 vjeç), që humbi jetën në betejë të po asaj dite.
Izraeli ka reaguar duke kufizuar ndihmat humanitare të premtuara për Gazën, ndërsa një zyrtar amerikan ka theksuar se procesi i nxjerrjes së trupave mund të zgjasë javë të tëra për shkak të shkatërrimeve masive. SHBA pritet të ofrojë shpërblime për çdo informacion mbi vendndodhjen e trupave, me ekspertë turq që do t’i bashkohen kërkimeve.
Nga ana tjetër, dy këshilltarë të ish-presidentit Trump janë shprehur se Hamasi ka vepruar “me mirëbesim” duke kthyer të gjithë pengjet e gjallë, ndaj vonesa në kthimin e trupave nuk përbën shkelje të marrëveshjes.
Izraeli paralajmëron se nuk do të bëjë kompromis për rikthimin e të gjitha trupave, ndërsa Ministri i Mbrojtjes ka urdhëruar ushtrinë të përgatisë një “plan të plotë” për veprim ushtarak në rast se marrëveshja dështon.
Në një deklaratë, Forumi i Familjeve të Pengjeve falënderoi autoritetet për kthimin e trupave të Hayman dhe al-Atresh, duke theksuar: “Nuk do të ndalemi deri sa të kthehen edhe 19 pengjet e mbetura.”
Ndërkohë, shefi humanitar i OKB-së, Tom Fletcher, i ka bërë thirrje Izraelit të hapë të gjitha kalimet kufitare për ndihma, duke kërkuar që të dyja palët të respektojnë marrëveshjen.
Në Gaza, situata mbetet e rënduar. Çmimet e ushqimeve janë rritur me rreth 30%, ndërsa banorët po grumbullojnë rezerva nga frika e rifillimit të luftimeve. “Sa herë që ndjejmë pak siguri, shfaqen kërcënime të reja,” thotë Neven Al-Mughrabi, nënë e gjashtë fëmijëve nga Khan Younis. “Askush nuk beson se kjo qetësi do të zgjasë.”
