Sot, më 5 shtator, shënohen 28 vite nga vdekja e humanistes shqiptare dhe fitueses së Çmimit Nobel për Paqe, Shën Nënë Tereza. Gruaja që e deshi e gjithë bota u shenjtërua më 5 shtator 2016 nga Papa Françesku në një ceremoni madhështore në Sheshin “Shën Pjetri” në Vatikan.
E lindur më 26 gusht 1910 në Shkup, me emrin Anjezë Gonxhe Bojaxhiu, Nënë Tereza e përkufizonte veten me fjalët:
“Me gjak jam shqiptare. Me shtetësi jam indiane. Me besim, murgeshë katolike. Me profesion, i përkas botës. Me zemër, plotësisht Zemrës së Jezusit.”
Shenjtërimi i saj u mundësua nga njohja e dy mrekullive:
- Mrekullia e parë (2002): Shërimi i Monika Besrës në Indi nga një tumor në stomak, pas lutjes përpara ikonës së Nënë Terezës.
- Mrekullia e dytë (2015): Shërimi i një 25-vjeçari brazilian nga tumori në tru, e njohur nga Papa Françesku.
Nënë Tereza u lumturua më parë, në tetor 2003, nga Papa Gjon Pali II.
Asambleja e Përgjithshme e Kombeve të Bashkuara, përmes një rezolute të veçantë, shpalli 5 shtatorin Ditën Ndërkombëtare të Bamirësisë, në nderim të saj.
Shën Nënë Tereza mbetet një nga figurat më frymëzuese të shekullit XX, duke u bërë simbol i dashurisë, sakrificës dhe shërbimit ndaj më të varfërve.
