Një grua e moshuar ka humbur jetën dhe një person tjetër është zhdukur pas një zjarri masiv që ka përfshirë rajonin e Aude në Francën jugore, duke shkatërruar të paktën 25 shtëpi dhe duke detyruar mijëra njerëz të evakuohen.
Zjarri shpërtheu të martën pranë fshatit La Ribaute dhe ka djegur tashmë mbi 13,000 hektarë, një sipërfaqe më e madhe se qyteti i Parisit, duke u konsideruar si zjarri më i madh në Francë këtë vit.
Shtatë zjarrfikës janë trajtuar për thithje tymi, ndërsa dy persona janë në spital, njëri në gjendje kritike. Më shumë se 1,800 zjarrfikës dhe 500 automjete janë mobilizuar në operacionin e shpëtimit.
Zyrtarët lokalë thonë se zjarri po përparon me shpejtësi, i nxitur nga erëra të forta, thatësira ekstreme dhe temperaturat e larta.
Kryetari i fshatit Jonquières, Jacques Piraud, deklaroi për Le Monde se 80% e fshatit është djegur, duke përshkruar pamjen si “dramatike” dhe “e zezë nga hiri”.
Sipas BBC, të paktën 2,500 familje janë pa energji elektrike, ndërsa autoritetet kanë mbyllur rrugët dhe kanë paralajmëruar se është tepër e rrezikshme për kthim në shtëpi.
Sipas shërbimit francez të menaxhimit të emergjencave, mbi 15,000 hektarë janë djegur këtë verë në të gjithë Francën, por zjarri në Aude përbën pjesën më të madhe të dëmit.