Nënkryetari i Partisë Demokratike, Luçiano Boçi deklaroi sot se “opozita po ndjek një proces moral për zgjedhjen e kandidatin të saj për zgjedhjet e parakohshme në Tiranë”.
Në një intervistë televizive, Boçi u shpreh se nëse negociatat do të vazhdojnë me të njëjtin ritëm brenda 2-3 ditësh opozita do të prezantojë kandidatin e saj për Tiranën. Boçi iu referua negociatave që grupi i punës në PD po kryen me aleatët dhe partitë e tjera opozitare për një emër të përbashkët për kandidatin në zgjedhjet e kryeqytetit.
“Së bashku me partitë e tjera opozitare po ndiqet një proces që është sa politik po aq i domosdoshëm dhe moral. Nuk është vetëm sfidë emrash, por është edhe sfidë e rëndësishme politike”, u shpreh Boçi.
Sipas tij, “emri nuk ka rëndësi, por procesi dhe modeli i procesit të zgjedhjes së kandidatit nga opozita është shumë e rëndësishme dhe ky model që po ndjekim është i duhuri”.
“Jemi në negociata, por këto janë ditët kulmore. Nëse negociatat vazhdojnë në rrugën e drejtë mendoj për 2 ose 3 ditë do kemi kandidatin për bashkinë e Tiranës”, u shpreh Boçi.
