Elvis Shkëmbi, 30 vjeçari i akuzuar për vrasjen e gjyqtarit Astrit Kalaja, ka dhënë dëshmi të re në polici, ku ka pranuar se armën e mbante gjithmonë me vete dhe se e qëlloi gjyqtarin për shkak të mllefit pas vendimit gjyqësor.
“Dëgjova vendimin e gjykatësit, armën e kisha me vete. E mbaja gjithmonë me vete dhe ashtu e mendova për momentin u ngrita dhe e qëllova, më kapi një si mllef,” – deklaroi autori në dëshminë e tij të dytë.
Policia vijon hetimet për të zbardhur plotësisht motivet e ngjarjes dhe rrethanat që çuan në këtë akt të rëndë. Autoritetet kanë theksuar se do të shqyrtojnë gjithashtu mënyrën e mbajtjes së armës nga i riu, si dhe çdo element tjetër që lidhet me përgjegjësinë penale.
Ndërkohë, xhaxhai i autorit, Gjon Shkambi, deri në këto momente nuk ka dhënë asnjë deklaratë për grupin hetimor, duke refuzuar të komentojë mbi ngjarjen ose mbi motivet që mund të kenë çuar nipin e tij drejt veprës penale.
Hetimet pritet të vazhdojnë edhe në ditët në vijim, ndërsa familja e gjyqtarit Astrit Kalaja dhe publiku presin për një zhvillim ligjor që të sqarojë të gjitha rrethanat e kësaj vrasjeje tronditëse.
