Presidentja e Kosovës, Vjosa Osmani, ka përkujtuar sot Ditën Ndërkombëtare të Personave të Zhdukur me Dhunë, duke i bërë thirrje Serbisë dhe komunitetit ndërkombëtar për drejtësi. Ajo vë në dukje se edhe pas më shumë se dy dekadash nga përfundimi i luftës, 1584 qytetarë të zhdukur ende i mungojnë vendit të tyre.
Sipas Osmanit, varret e hapura janë dëshmi e gjallë e krimeve të luftës dhe e krimit të përsëritur nga regjimi serb, ndërsa drejtësia për të zhdukurit nuk është vendosur ende. “Për sa kohë që mijëra qytetarë tanë mbesin të zhdukur, paqja mbetet e paplotë”, thekson Presidentja.
Ajo i kujton Presidentit serb, Aleksandër Vuçiq, se regjimi i tij “vazhdon të flejë mbi varreza masive, duke mbajtur peng zbardhjen e fatit të të zhdukurve”, dhe u bën thirrje partnerëve ndërkombëtarë të rrisin presionin mbi Serbinë, për të siguruar drejtësinë dhe qetësinë për familjet e viktimave.
