Turizmi vazhdon të mbetet një nga shtyllat kryesore të ekonomisë shqiptare. Banka e Shqipërisë publikoi të dhënat më të fundit, sipas të cilave gjatë gjysmës së parë të vitit 2025, vizitorët e huaj kanë shpenzuar rreth 2,1 miliardë euro, një rritje me 7,7% krahasuar me të njëjtën periudhë të vitit 2024.
Në këtë periudhë, sipas INSTAT, Shqipëria ka pritur 4,7 milionë turistë të huaj, me një rritje prej rreth 5% nga një vit më parë. Përveç plazheve dhe klimës së favorshme, vizitorët janë tërhequr edhe nga zonat malore, trashëgimia historike e kulturore, si dhe mikpritja e njohur e shqiptarëve.
Nga ana tjetër, edhe shqiptarët kanë rritur shpenzimet për udhëtime jashtë vendit. Vetëm në gjysmën e parë të këtij viti, ato arritën në 1,3 miliardë euro, duke shënuar një rritje vjetore prej 7,5%.
Megjithatë, bilanci i udhëtimeve mbetet pozitiv. Diferenca mes të ardhurave nga turistët e huaj dhe shpenzimeve të shqiptarëve jashtë arriti në 800 milionë euro, duke treguar fuqinë eksportuese të turizmit shqiptar.
Sipas ekspertëve, turizmi tashmë është kthyer në një aktivitet gjithëvjetor, që jo vetëm sjell të ardhura të mëdha për ekonominë, por edhe e promovon Shqipërinë si një destinacion të qëndrueshëm dhe konkurrues në rajon.
